调教你MIRROR

「將來是好或是壞，根本無法控制。但我地可以控制的是，此刻有沒有盡力去做想做的事。」將來可以紅幾耐、行幾遠、解散會否，無人知，阿祖叫佢地好好珍惜、好好享受當下。壞與更壞嘅現實社會下，對於我地，亦是如此。

從來無關注過男團，睇調教都係得閒消遣下，之前淨係識solo過嘅幾個，前幾集仲未搞清12條仔嘅樣同名。作為一個毫無粉絲濾鏡嘅路人，都逐漸發現每個人身上charm嘅一面，終於都明點解mirror世一，點解可以創造廣東歌、香港樂壇嘅新天地。

尋回初心嗰集每個人重新表演翻造星1舞台，回顧當年素人造型真係驚訝到我，哈哈哈原來佢以前咁嘅樣！同埋佢地嘅進步真係睇得出。「兩年半時間，就好似經歷咗千秋萬代咁樣，由比賽到成軍，由一開始畀人睇死，到一場一場仗咁打出來」。就係因為唔使報名費就試下咯，姜b嘅123我愛你成為香港人嘅集體回憶。

無花姐，無束縛，放開大飲大食。放低一貫嘅chok樣，素顏可以好噏耷，眼水鼻水流成面，盡顯低能小學雞、脆弱、負面一刻。偶像團體，水平各異，關係複雜，兄弟情同競爭感嘅矛盾混合體。

最後一集嘅最後，演唱會上《給自己的信》加入梅窩記憶嘅編排，好觸動。唔係齋為咗拍節目為咗fan屎開心，個人鬱結、彼此芥蒂、攬埋一齊喊，都坦露鏡仔真實一面。即使未曾經歷過佢地所經歷，係旁觀者都會感動嘅「成長」。

阿祖so true。一齊癲，真心傾偈，真誠反饋。打開個結，其實唔容易。乜都無真誠同善良重要。

每一集都唔夠半粒鐘，咁多部cam咁雜嘅素材可能得三分之一出街，可能實在太多剖心赤裸對話。剪輯太亂太碎，仲有幾集不知所謂，不過配樂動效幾好，辛苦幕後團隊。